Þann 13. september var opnað skrifstofuhótel í Þorlákshöfn og er það Steinavík ehf. sem tekur að sér að reka hótelið. Um er að ræða þriðja hótelið sem ætlunin er að opna innan vébanda verkefnisins Sunnan3 - rafrænt samfélag. Fyrsta hótelið var opnað á Selfossi í febrúar s.l. og annað hótel var opnað í Hveragerði í lok júní. Skrifstofuhótelið í Þorlákshöfn er til húsa að Unibakka 11.

Markmiðið með uppbyggingu skrifstofuhótela er að koma til móts við þarfir íbúa sem starfa á höfuðborgarsvæðinu, en vilja og hafa tök á því að vinna hluta vinnutíma síns í heimabyggð. Um er að ræða fullkomna skrifstofu-aðstöðu með öflugu háhraðasambandi og hvetjandi vinnuumhverfi. Kostir skrifstofuhótels eru augljósir fyrir starfsfólk sem þarf að sækja vinnu fjarri heimabyggð. Hér er einnig um að ræða möguleika á hagræðingu fyrir vinnuveitendur í lækkun skrifstofukostnaðar. Að auki getur skrifstofuhótel haft jákvæð samfélagsleg áhrif þar sem það getur dregið úr umferð í tengslum við atvinnusókn, mengun og slysahættu.

Fyrsta Skrifstofuhótel á Íslandi tekur til starfa á Selfossi fimmtudaginn 24 febrúar. Um er að ræða fyrsta hótelið af þremur sem ætlunin er að opna á Árborgarsvæðinu innan vébanda verkefnisins Sunnan3 - rafrænt samfélag.

Skrifstofuhótelið er samvinnuverkefni Sunnan3 - rafræns samfélags, Verkfræðistofu Suðurlands og Tölvu- og radíóþjónustu Suðurlands (TRS). Skrifstofuhótelið verður staðsett í húsnæði Verkfræðistofu Suðurlands á annari hæð í 'Kjarnanum' Austurvegi 3-5 á Selfossi og þar verður opnunarathöfnin haldin.

Markmiðið með uppbyggingu Skrifstofuhótels er að koma til móts við þarfir íbúa sem starfa á höfuðborgarsvæðinu, en vilja og hafa tök á því að vinna hluta vinnutíma síns í heimabyggð. Um er að ræða fullkomna skrifstofuaðstöðu með öflugu háhraðasambandi og hvetjandi vinnuumhverfi. Kostir skrifstofuhótles eru augljósir fyrir starfsfólk sem þarf að sækja vinnu fjarri heimabyggð. Hér er einnig um að ræða möguleika á hagræðingu fyrir vinnuveitendur í lækkun skrifstofukostnaðar. Að auki getur skrifstofuhótel haft jákvæð samfélagsleg áhrif þar sem það getur dregið úr umferð í tengslum við atvinnusókn, mengun og slysahættu.

Árni Magnússon félagsmálaráðherra mun opna Skrifstofuhótelið með formlegum hætti. Árni er búsettur í Hveragerði og telst því vera í markhópi þeirra sem geta nýtt sér Skrifstofuhótel, enda hefur hann sótt vinnu til höfuðborgarsvæðisins á undanförnum árum. Að auki munu talsmenn Sunnan3 verkefnisins og rekstraraðilar Skrifstofuhótelsins flytja ávörp og kynna hugmyndafræðina á bak við skrifstofuhótelið og Sunnan3 verkefnið almennt.

Frekari upplýsingar er að finna á: www.sunnan3.is eða hjá verkefnisstjóra Sunnan3, í síma 6931533, netfang: siggi@sunnan3.is

Sunnan3 hefur komið á samstarfi við Orkuveitu Reykjavíkur (OR) um þarfagreiningu og hugsanlega uppbyggingu rafrænnar grunngerðar á starfssvæði verkefnisins. Til að byrja með mun OR aðstoða Sunnan3 við tæknilega þarfagreiningu vegna fyrirhugaðrar uppbyggingar á grunnnetinun. Ákveðið var að stofna sérstakan ráðgjafahóp um tæknileg málefni verkefnisins og mun Þorleifur Finnsson framkvæmdastjóri nýsköpunarsviðs vera fulltrúi OR í hópnum. Aðrir í hópnum verða Ásbjörn Blöndal framkvæmdastjóri framkvæmda- og veitusviðs Árborgar og Júlíus Pálsson framkvæmdastjóri TRS á Selfossi, en fyrirtækið hefur verið aðili að Sunnan3 frá upphafi. Orkuveitan er tilbúin til þess að kalla til sérfræðinga á ýmsum sviðum við þessa þarfagreiningu. Litið verður á vinnu OR sem framlag þeirra til verkefnisins, án frekari skuldbindinga af hálfu Sunnan3.

Sunnan3 áformar að gefa íbúum kost á að sækja námskeið í almennri tölvunotkun og notkun rafræns þjónustutorgs á næstunni. Námskeiðin verða haldin í samvinnu við Fræðslunet Suðurlands, og er þeim fyrst og fremst ætlað að hjálpa þeim sem eru að stíga sín fyrstu skref í tölvunotkun og öðrum þeim sem telja sig á grunnþjálfun í tölvunotkun að halda. Meðal þess sem notendur ættu að geta eftir námskeiðið er að senda tölvupóst, ferðast um internetið, notað heimabanka, skrifað bréf í Word o.fl. Í tengslum við námskeiðin verður gefin út sérstök kennslubók um tölvunotkun fyrir byrjendur þar sem m.a. verða leiðbeiningar um notkun rarfæns þjónustutorgs Sunnan3. Íbúar geta óskað eftir að fá bókina senda með því að skrá sig inn í þjónustutorgið og senda skilaboð til síns sveitarfélags.

Um leið og rafræna þjónustutorgið var opnað almenningi var gefinn út vandaður kynningarbæklingur um þjónustuna og nýjungarnar sem þar er að finna. Bæklingnum var dreift inn á hvert heimili í Árborg, Hveragerði og Ölfusi.

Á baksíðu bæklingsins er að finna góðar leiðbeiningar um það hvernig nýjir notendur skrá sig inn á þjónustutorgið og hvernig þeir fá notandanafn og lykilorðið sent. Þú getur nálgast bæklinginn á rafrænu formi með því að smella hér.